تجربتى 2

استكمالا لتجربتى فى امتحانات الخارجية(ملحقين دبلوماسين) هكمل موضوع الشفوى بقى
الحقيقة وعلشان نبقى على نور انا كنت داخلة امتحان الشفوى الاول ده كتجربة او استكشاف عاوزة اشوف اية اللى بيحصل وطبعا كنت متاكدة انه لية معايير مختلفة هما عاوزين ناس على الفرازة زى ما بيقولو بس انا قولت دى فرصة مش لازم اضيعهاولازم اعمل كل اللى على فية كملت بقى قراءة جرايد وتحليلات سياسية وكتب وطبعا روحت درس فرنساوى برايفت علشان اعرف انطق كويس يوم الامتحان واركز على الاقتصاد لانه تخصصى واكيد هيسالونى فية كتير والنت طبعا حتى جوجل زهق منى من كتر ما بعمل سيرش علية والهيئة العامة للاستعلامات ووووووووووووو حاجات كتير واشتريت بدلة ربنا يمسيها بالخير بقى معدتش هتنفع لانى سمنت عليها خسارة ال700 ج بتوعها وطرحة ب 120 ج علشان تليق على البدلة ياللا كله عند ربنا بقى وجه امتحان الكمبيوتر وكان كويس الحمد لله وبعدين اختبار القدرات وده جابونا من الساعة 9 الصبح لغاية 5 المغرب عمالين نحل فى اختبارات واستبيانات وبعدية المقابلة النفسية لغاية ما حددو ميعاد الشفوى اللى هو الانترفيو يعنى
وروحت الامتحان والصراحة انا ركبى كانت بتخبط فى بعضها وكل اللى كنت مستعدة ليةه من هدوء وثقة بالنفس وكل الكلام ده كانه اتبخر فى الهوا معقول انا على بعد خطوة من تحقيق حلمى يعنى كل اللى جاى من عمرى هيترتب على الانترفيو ده وحاجات كتير كانت بتدور فى راسى لغاية ما لقيت التليفون رن
اه نسيت اقولكم احنا كنا قاعدين فى قاعة كبيرة قوى قوى وكنا حوالى 8 تقريبا 4 بنات و4 اولاد فى اليوم ده
وجه اتنين دبلوماسين قعدوا معانا فى القاعة دى وواحد ادارى وجنبه تليفون اول ما التليفون يرن يدخلو واحد يعنى جه الدور علية
الحمد لله انا مكنتش اول واحدة بس بعد كدة جه الدور على لا مفر يعنى
قومت انا بكل ثقة ومشيت مع الراجل الادارى ده لغاية اوضة فى اخر الدور وبعدين لقيته هيفتح الباب قولتله لا استنى
انا لازم اقول الاول وجعلنا من بين ايديهم سدا ومن خلفهم سدا فاغشينهم فهم لا يبصرون
ودخلت ومش عاوزة احكى تفاصيل الامتحان لانه لم يتعدى 17 دقيقة اسئلة اسئلة اسئلة لغاية ما قالولى اتفضلى شكرا
وخلصت الانترفيو ولسان حالى بيقول دا اية ده الحمد لله انى خلصت
وخرجت نزلت علشان اروح وكانت اختى مستنيانى برهقالتلى مالك يا بنتى عملة زى الفرخة المدبوحة كده لية قولتلها بجد
مكنتش دريانه بالدنيا قولتلها هاتى تاكسى وروحينى مش قادرة خلاص
وقبل ما النتيجة تظهر نزل اعلان جديد عاوزين ملحقين دبلوماسين
قولت لازم اقدم تانى علشان لو ربنا موفقنيش مضيعش فرصة الامتحان من ايدى ورجعت لدوامة المذاكرة تانى
ويا ابو الملل انك تذاكر حاجات ذاكرتها وامتحنت ونجحت فيها قبل كدة
بس انا قولت كله يهون علشان عيون الخارجية
وبعد شهر تقريبا ظهرت النتيجة والحمد لله مكنتش ضمن الناجحين
بس الصراحة انا قولت دى كانت تجربة اولى
المرة التانية هسوى الهوايل وانا اخدت خبرة كبيرة خلاص
ودخلت الامتحان وانا بقول يا قاتل يا مقتول المرة دى
وللتجربة بقية مادام فى العمر بقية