واكتملت تجربتى

المهم علشان مطولش عليكم وكمان علشان نكسب وقت دخلت الامتحان تانى وتالت وكل مرة على نفس المنوال اذاكر وامتحن التحريرى وانجح واكمل امتحانات الشفوى لغاية الانترفيو وفى الاخر ميحصلش نصيب وكل مرة بيبقى عندى اصرار اكتر من المرة الللى قبلها وطبعا خبرة ومعلومات اكتر بقيت خلاص خبيرة فى امتحانات السلك

فى تالت مرة لما النتيجة ظهرت قولت بقى اغير العتبة طبعا مش عتبة بيتنا عتبة الوزارة ساعتها كان نزلت مسابقة التمثيل التجارى (ملحقين تجارين) قولت بس هى دى فرصتى الحقيقية دا مجالى انا خريجة اقتصاد وبردة بدأت رحلة الاستعداد للامتحان تانى
والصراحة انا متعبتش فيه قد الامتحانات اللى فاتت يمكن لانه معظمها مواد درستها فى الكلية أو لانى كنت واخدة خبرة كبيرة من امتحانات الخارجية مش عارفة
ودخلت الامتحان وظهرت النتيجة والحقيقة كمان انا كنت متوقعة انى انجح فية رغم انه اسئلتة متخصصة اكتر
وبدات تانى بقى رحلى الشفوى بس المرة دى كانت اطول بكتير لانهم امتحنونا الكمبيوتر والقدرات فى يوم وقعدنا اكتر من9 شهور ولا حس ولا خبر كل ما نتصل نسال يقولو لسة الميعاد متحددش
هبقى نتصل بيكم
نسيت اقول انه العدد اللى ناجح فى التحريرى كان 15 بس والكل كان متوقع انهم ياخدو العدد كلة لاكتر من سبب اهمهم انه م محتاجين ملحقين لانه مفيش فى الوزارة غير 4 ملحقين بس من المسابقة اللى فاتت فالهرم عندهم مقلوب العدد الاكبر وزراء مفوضين وفى طريقهم للمعاش ومفيش كوادر جديدة وأهو كله كان تشجيع لينا
، فى الوقت اللى كان بعد ما النتيجة ظهرت كنت مقدمة على شغل واتقبلت فية وقولت اخلينى شغاله لحد ما امتحن وتظهر النتيجة لانى كنت زهقت من المذاكرة لاكتر من سنة كاملة متفرغاها للامتحانات ومفيش شغلومش معقول هقعد كل ده مستنية الانترفيو ولان الشغل دة كان فرصة بالنسبة لى لانه فى مكان كويس وهودة عملى الحالى الحمد لله

ونرجع لموضوعنا بعد حوالى 10 شهور لقيتهم بيتصلو من قطاع التمثيل التجارى اختبار الشفوى بتاعك بعد اسبوعين بردة حضرت نفسى كويس وكنت بتابع ساعتها الاحداث الجارية ومجهزة نفسى للانترفيو دى كانت المرة الرابعة لى 3 دبلوماسى قبله كنت داخلة واثقة فى نفسى كدة وحسة انه ده هيبقى مكانى والناس دى هتبقى زمايلى ويا ريتنى ما اتعشمت قوى كدة
الامتحان كان اطول من امتحانت الدبلوماسى حوالى نص ساعة اسئلة كلها لها علاقة بامتحانات الدبلوماسى ومعلومات عامة واسئلة متخصصة
المرة دى كنت راضية عن نفسى قوى وانا خارجة من الامتحان لانى جاوبت معظم الاسئلة اكتر من 80% منها وكمان هما محتاجين ملحقين والعدد اللى ناجح من الشفوى تقلص ل13 بس يعنى كل الامور ميسرة اهو
بعد شهر اتصلت بى واحدة زميلتى فى الامتحان ده باباها شغال فى الوزارة قالتلى الحقى النتيجة ظهرت ولم ينجح احد

ولا تعليق غير

حسبنا الله ونعم الوكيل